Балкан
3. May 2017 - 19:14

Ердоган: Турција и натаму ќе презема мерки против заканите што доаѓаат од нејзината граница со Сирија

Турција ќе продолжи да презема мерки против заканите што доаѓаат од нејзините јужни граници со Сирија и Ирак, изјави денеска турскиот претседател Реџеп Тајип Ердоган, пренесоа британските медиуми.

На заедничка прес-конференција со својот руски колега Владимир Путин во Сочи, Ердоган изјави дека верува дека Путин ќе одигра важна улога во воспоставување на примирјето во Сирија.

Ердоган посочи дека Турција не прави разлика меѓу сириските курдски Сили за заштита на народот, кои се подржани од САД како нивни сојузник во борбата против Исламска држава, и оваа радикална сунитска група.

- Ние не правиме разлика меѓу терористички организации. ДАЕШ (арапскиот акроним за Исламска држава), СЗН, Ал Каеда за нас се едно исто, посочи Ердоган во коментарот што во живо беше пренесуван на телевизија.

- Наша заедничка одговорност е да ги искорениме, додаде турскиот претседател.

Ердоган повеќе пати ги критикуваше САД за нивната поддршка за Силите за заштита на народот во борбата против ИД.

Турција овие курдски сили ги смета за терористичка организација, поврзана со Курдската работничка партија (ПКК).