Бизнис
21. јуни 2016 - 9:35

Џорџ Сорос: Брегзит ќе предизвика пад на фунтата и на вработеноста

Американскиот инвеститор Џорџ Сорос предупредуи денеска на „сериозните последици“ за вработеноста во Велика Британија, како и за финансиите на земјата, доколку Британците в четврток се определат за Брегзит.

Во авторски текст во лондонски „Гардијан“ Сорос наведува дека проблемите ќе ги предизвика падот на фунтата на светските берзи.

Овој американски финансиер, од унгарско потекло, во Велика Британија е познат како човекот кој ја „урна“  фунтата, во текот на „Црниот четврток“  во 1992 година, кога со низа трансакции на хеџ фондовите, предизвика девалвација на британсксата национална валута.

Сега Американецот предупредува оти напуштањето на ЕУ ќе предизвика поголеми потреси и пад на вредноста на фунтата од најмалку 15 отсто во однос на  доларот, со можно паѓање и до повеќе од 20 отсто. 

Тоа би довело, фунтата да се менува за 1,15 долари, наместо за сегашните 1,46 долари.

- Фунтата ќе ја губи својата вредност забрзано и ситуацијата ќе биде полоша од онаа во 1992 година, предизвикувајќи веднаш силен ефект на финанскиот пазар, врз инвестициите и цените, но и во голем обем и врз вработеноста во земјата, оценува Сорос.

Според овој инвеститор, британските гласачи досега беа силно потценети и дезинформирани околу вистинската цена на Брегзит.

- Премногу луѓе веруваат дека заминувањето од ЕУ нема да има никаков ефект врз нивните лични финансии, но тоа е само пуста желба на оние кои пропагират Брегзит, пишува Сорос во „Гардијан“.