Тие велат дека и натаму ќе продолжат со активностите и мерките за превенција и заштита на повеќе локации во Република Македонија.

- На патниот правец Струмица – Берово,  по појавувањето на одрон, екипите на ЈП „Македонија пат“, веднаш излегоа на терен и патот е оспособен за сообраќај по едната коловозна лента. На локацијата се работи со вклучена механизација на расчистување и се очекува во текот на денот патот да се оспособи за сообраќај по двете коловозни ленти, се вели во соопштението од Министерство за транспорт и врски.

Одроните на патниот правец Маврово – Дебар, како што се додава, се расчистени уште во текот на вчерашниот ден и овој патен правец е прооден за сообраќај по двете коловозни ленти.

Водотеците во западните делови на Републиката, пред се во сливот на реката Црн Дрим и во Охридско-преспансиот регион се уште имаат тренд на опаѓање на водостојот. Водостојот на Охридско Езеро бележи стагнација и во однос на вчерашниот ден нема промени во нивото.

Во соопштението е наведено дека денеска во посета на Охридско-струшкиот регион со цел увид во активностите на самото место е директорот на Центарот за управување со кризи, Панде Лазаревски.

Во текот на денов продолжуваат активностите за чистење и уредување на речните корита на водотеците Коселска река, Сатеска река и Мал Дрим во општина Охрид кои ги спроведуваат екипите на Дирекцијата за заштита и спасување.

Од Управата за хидрометеоролошки работи информираат дека во текот на денешниот ден времето ќе биде променливо облачно со сончеви периоди и услови за слаби локални врнежи од дожд во северните делови од земјата. За попладне се предвидува намалување на облачноста и престанување на врнежите. За утре се прогнозира сончево време со умерена облачност.