По само три години постоење најзначајната културно забавна манифестација во Малешевијата ги привлече странските автори кои се во потрага по изворниот фолклор од сите делови на светот.

- Во изминативе 13 месеци посетивме 19 различни земји и се обидовме да ја пронајдеме традиционалната музика и инструментите-изјави Гери Блантон, извршен продуцент “По патот на ритамот”.

За фестивалот дознал преку интернет и иако скоро и да го обиколиле светот, сепак во Македонија се надева дека ќе се соочат со нешто навистина оригинално и уникатно.

- Посетивме неколку фестивали во Сингапур, Азија, неколку во Северна Америка, но ова е различно, сепак ова е Балкан- изјави Блантон.

Филмот ќе биде целосно завршен кон крајот на годинава, кога покрај Беровскиот како претставник на Европа, ќе бидат комплетирани материјалите и од етно  фестивалите од Африка, Азија и Северна Америка.

Премиерно ќе биде прикажан на некој од фестивалите за документарен филм , а подоцна и на големите светски сервиси специјализирани за ваков вид програми.  Од локалната самоуправа велат дека сето ова само по себе зборува за реномето на беровската манифестација.

 - Од огромно значење е за нас од Општината, посебно за равојот на туризмот, сметајќи дека ова ќе биде пренесено во целиот свет- изјави Драги Наџински, градоначалник на Берово

Етно плоштад фестивалот и годинава ќе се одржи на 26 и 27 август, на кој ќе земат учество претставници од повеќе земји, а ќе се одржи и етно саем на традиционални домашни производи.

Трајан Ристовски