Димитров: Клучен приоритет во надворешната политика останува членството во ЕУ

Министерот за надворешни работи Никола Димитров денеска пред дипломатскиот кор на традиционалниот Новогодишен и Божиќен прием порача дека членството во Европската унија останува клучен приоритет во надворешната политика на Македонија и изрази очекување оти реформската ориентираност на земјата, напролет ќе донесе безусловна препорака за почеток на претпристапните преговори.  

- Искрено се надеваме дека нашата политичка волја и реформска ориентираност, заедно со поддршката на нашите пријатели и партнери, ќе ни донесе безусловна препорака за почеток на пристапните преговори, следната пролет. Ова е пред се во интерес на нашите граѓани, но исто така и во интерес на земјите од регионот и пошироко, истакна Димитров. 

Тој ја нагласи и детерминираноста на Македонија за евроатлантска интеграција, но и за поголем придонес на мултилатерален план на кој државата прави значајни чекори преку неодамнешната ратификација на Парискиот климатски договор и онаа на Советот на Европа (Истанбулската конвенција за превенција и борба против насилството врз жената и семејното насилство), чие ратификување се очекува наскоро. 

Амбасадорот на Руската Федерација, Олег Николаевич Шчербак, во име на сите членови на дипломатскиот кор му се заблагодари на министерот Димитров за приемот и ја истакна добрата и продуктивна атмосфера во соработката на дипломатскиот кор со Министерството за надворешни работи и со сите други државни институции.