Свет
25. March 2016 - 9:19

Дел Понте: Караџиќ ќе има време да зажали поради злосторствата

Поранешниот главен обвинител на Хашкиот трибунал, Карла дел Понте смета дека поранешниот лидер на босанските Срби, Радован Караџиќ морал да добие доживотна казна затвор.

Таа за белградскиот весник „Блиц“ изјави дека сепак не е незадоволна од пресудата со која Караџиќ е осуден на 40 години затвор за геноцид во Сребреница и извршени злосторства против човештвото врз муслиманите и Хрватите за време на војната во БиХ.

- Мора да се признае дека правдата е сепак задоволена. Искрено се надевам дека Караџиќ ќе има повеќе од доволно време во својата затворска ќелија да размислува за сите злосторства кои ги извршил и поради нив да зажали, истакна Дел Понте, која денес го истражува кршењето на човековите права во Сирија.

Таа нагласи пресудата е многу важна за мирот и стабилноста во регионот.