Кошарка
10. December 2017 - 14:49

АБА лига: МЗТ Скопје домаќин на Морнар

Македонскиот кошаркарски првак МЗТ Скопје Аеродром попладнево во СЦ „Јане Сандански“ (почеток 17 часот) го игра дуелот од 11.коло од АБА лигата. „Металците“ под водство на новиот тренер Жељко Лукајиќ ќе се обидат да стигнат до третата победа во ова натпреварување.
 
Нивни ривал денеска им е екипата на Морнар, која се наоѓа на 11.место или веднаш пред МЗТ Скопје кој е последен. Во меѓусебните дуели на овие два тима билансот е 2-0 за Морнар, кој во ланската сезона победи во двата дуела, а во Скопје славеше со 69:63.
 
На денешниот дуел на трибините е најавено враќање и на навивачката група „Фемили“, а дел од навивачите беа присутни и на еден дел од вчерашниот тренинг на тимот.
 
Во АБА лигата на чело на табелата се наоѓа Будуќност со 10 победи и еден пораз, а следуваат Цедевита (8-3) и Црвена Звезда (8-2)